በምዕራብ ሸዋ ዞን በዳሮ ወረዳ፤ ነዶ ወረዳና ጅባት ወረዳ የሚገኙ ዐማሮች የካቲት 11/2014 ዓ.ም በኦሮሚያ ልዩ ኃይል በድሽቃ፣ በስናይፐርና በሞርታር ተደብድበዋል፡፡ በጥቃቱ አራት ሰዎች እንደሞቱ፣ ከቦታው ተፈናቅለው ደብረብርሃን የገቡ የአካባቢው ነዋሪዎች ገለፁ፡፡

በሶስቱ ወረዳዎች በአስር ሺዎች የሚቆጠሩ ዐማሮች በከተማና በገጠር የሚኖሩ ሲሆን፣ ጠ/ሚ/ር ዐቢይ ሥልጣን በያዙ ማግስት ኦነግ/ሸኔ በአካባቢው መንቀሳቀስ እንደጀመረ ደብረብርሃን የገቡት ተፈናቃዮች ይናገራሉ፡፡ ኦነግ/ሸኔ ወደ አካባቢው መጀመሪያ ሲገባ የታጠቃቸው መሳሪያዎች ብሬን፣ ስናይፐርና ክላሽ የነበሩ ሲሆን፣እስከ ሶስት መቶ ተዋጊዎችን የያዘ ኃይል ሆኖ ይንቀሳቀስ ነበር፡፡

ይህ ኃይል በአካባቢው እንደደረሰ ዐማራን እየለየ እየገደለ፣ እያፈናቀለና ንብረት እያወደመ ቢቆይም ፣ መንግሥት ምንም እርምጃ ባለመውሰዱ፣ የአካባቢው ማህበረሰብ በግል መሳሪያ እየገዛ ራሱን ከመከላከል አልፎ ኦነግ/ሸኔን ለማዳከም ችሎ ነበር፡፡ በዚህ የተቆጡትና በኦሮሚያ ክልላዊ መስተዳድር ያሉት የኦነግ/ሸኔ ሰርጎ ገቦች፣ የኦሮሚያ ልዩ ኃይልን ወደ አካባቢው በመላክ በህዝቡ ላይ ከባድ የቡድን መሣሪያ በሆነው ዲሽቃ ያልታጠቀውን ህዝብ አስመትተውታል፡፡ በዚህ ጥቃት ሰዎች ሞተዋል፣ በርካታ ጉዳትም ደርሷል፡፡